ციტრამონი პ N10 ტაბ

ფარმაკოლოგიური ჯგუფი: ანალგეტიკური, სიცხის დამწევი კომბინირებული საშუალება.

წამლის ფორმა: ტაბლეტები.

გენერიული სახელწოდება: აცეტილსალიცილის მჟავა+ პარაცეტამოლი +კოფეინი (Acetylsalicilic acid+Caffeine+Paracetamol). 

ათქ კოდი: N02B E51.

წამლის ფორმა და შემადგენლობა: 

აქტიური სუბსტანცია: აცეტილსალიცილის მჟავა - 0,24გ; პარაცეტამოლი - 0,18გ; კოფეინი - 0,03გ; 

დამხმარე ნივთიერებები: ლიმონმჟავა; კაკაო; ლაქტოზა, სახამებელი, ტალკი, კალციუმის სტეარატი, პოლივინილპიროლიდონი, აეროსილი;    

ფარმაკოლოგიური მოქმედება: ციტრამონ “პ”-ს ტაბლეტები წარმოადგენს კომბინირებულ პრეპარატს, რომელსაც გააჩნია ტკივილგამაყუჩებელი, სიცხის დამწევი და მცირედ გამოხატული ანთების საწინააღმდეგო მოქმედება. აცეტილსალიცილის მჟავასა და პარაცეტამოლს აქვს ტკივილგამაყუჩებელი, ანთების საწინააღმდეგო და სიცხის დამწევი მოქმედება. კოფეინი ამცირებს სისუსტისა და დაღლილობის შეგრძნებას, მოქმედებს გულ-სისხლძარღვთა სისტემაზე: ზრდის გულის შეკუმშვათა სიხშირეს, ზრდის არტერიულ წნევას ჰიპოტონიის დროს.

ჩვენება: ციტრამონ ,,პ”-ს ღებულობენ: თავის, კბილის, სახსრების ტკივილის დროს. გამოიყენება სიცხის დამწევად გაციებისა და სხვადასხვა ინფექციური დაავადებების შემთხვევაში.

უკუჩვენება: მომატებული მგრძნობელობა პრეპარატის შემადგენელი კომპონენტებისადმი; კუჭისა და თორმეტგოჯა ნაწლავის წყლულოვანი დაავადება; კუჭ-ნაწლავის ტრაქტიდან სისხლდენა; ღვიძლისა და თირკმლების ფუნქციის დარღვევები; სისხლის სისტემის დაავადებები; გლაუკომა; ბრონქული ასთმა;  გლუკოზო-6 ფოსფატდეჰიდროგენაზას გენეტიკური დეფიციტი; ორსულობის  პირველი სამი თვე და ლაქტაციის პერიოდი; 15 წლამდე ასაკი; ვირუსული ინფექციით გამოწვეული მწვავე რესპირატორული დაავადებები.

გვერდითი მოვლენები: ალერგია, გულისრევა, ღებინება, ტკივილი მუცლის არეში, კანის სიფერმკრთალე, ტაქიკარდია.

სიფრთხილე: პრეპარატი სიფრთხილით ინიშნება პაციენტებში, რომლებიც დაავადებული არიან ბრონქული ასთმით და პოდაგრით.

პრეპარატის დანიშვნა არ არის რეკომენდებული ბავშვებში, რეინეს სინდრომის განვითარების მაღალი რისკის გამო.

ორსულობა და ლაქტაცია: პრეპარატის ორსულობის (I ტრიმესტრის გარდა) დროს გამოყენება დასაშვებია იმ შემთხვევაში, როდესაც დედისათვის მოსალოდნელი სარგებელი მკვეთრად სჭარბობს ნაყოფზე უარყოფითი მოქმედების პოტენციურ რისკს.

ჭარბი დოზა: დოზის გადაჭარბების შემთხვევაში აუცილებელია კუჭის ამორეცხვა და გააქტივებული ნახშირის მიღება.

ურთიერთქმედება სხვა სამკურნალო საშუალებებთან: კომბინირებული თერაპიის დროს გასათვალისწინებელია, რომ ციტრამონი ,,პ’’ აძლიერებს სისხლის ანტიაგრეგატულ თვისებებს - აქვეითებს სისხლის შედედებას და თრომბოციტების აგრეგაციას.

არასასურველია პრეპარატის კომბინაცია ბარბიტურატებთან, რიფამიცინთან, კრუნჩხვების საწინააღმდეგო საშუალებებთან და ალკოჰოლურ სასმელთან.

დოზირება და მიღების წესი: 1-2 ტაბლეტი 2-3-ჯერ დღეში. მაქსიმალური სადღეღამისო დოზა შეადგენს 6 ტაბლეტს. შუალედი მიღებებს შორის - არანაკლებ 6სთ.

გავლენა ავტოტრანსპორტისა და მექანიზმების მართვის უნარზე: პრეპარატი არ მოქმედებს ავტომობილის მართვისა და ტექნიკასთან მუშაობის უნარზე.

შეფუთვა: 10 ტაბლეტი პვქ/ალუ ბლისტერში.

შენახვის პირობები: ინახება მშრალ ადგილას, ოთახის ტემპერატურაზე. 

ვარგისიანობის ვადა: 4 წელი.

ვარგისიანობის ვადის ამოწურვის შემდეგ ან ვიზუალური დათვალიერებისას აღმოჩენილი დეფექტების შემთხვევაში პრეპარატის გამოყენება დაუშვებელია.

აფთიაქიდან გაცემის წესი: ფარმაცევტული პროდუქტის ჯგუფი III - გამოყენება შესაძლებელია ექიმის დანიშნულების გარეშე.